Грамота королевы Боны, подтверждающая пожалованіе Ф. И. Ярославича Новоше на две дворища и дворъ въ г. Пинске.1525 г. Апреля 20.
Подданый королевое ее милости повету Пинского Михно Новошычъ, которому отцу его Новошы, князь Федор Ярославичъ далъ две дворыщы в селе Серникахъ, а дворъ въ месте Пинскомъ, оказалъ прывилей королевое ее милости великой кнегини Боны на службе малерской, который ку замку служыти мел, на пергаменте писаный, подъ прывесистою печатью.
Бона Божою милостью Польская, великая кнегиня Литовская, Руская, Пруская, Жемеитская, Мазовецкая и иинныхъ.
Чынимъ знаменито симъ нашымъ листомъ нынешнимъ и напотомъ будучымъ, кому того потреба будетъ ведати, або чтучы слышати. Билъ намъ чоломъ Новоша, малеръ нашъ Пинскій и поведалъ передъ нами, што жъ князь Федоръ Ивановичъ Ярославчъ далъ ему две дворыщы в селе нашомъ Серникахъ, на име Скорбовщыну а Должовщыну, а еще далъ ему дворъ въ месте нашомъ Пинскомъ на Вору.
На чтожъ онъ и листъ князя Федоровъ передъ нами вказывалъи билъ намъ чоломъ, абыхмо ему на то дали нашъ листъ и то ему нашымъ листомъ потвердили.
Ино князь Федоръ, полецывшы се королю его милости, не мелъ моци никому ничого роздавати, а однакожъ мы, бачечы того ремесника намъ и месту нашому быть потребного а пожыточного, зъ особливое ласки нашое, на его чоломбытье есмо вчинили и на то есмо ему дали сесь нашъ листъ, и тые две пререченые дворыща и дворъ въ месте ему потвержаемъ тымъ то нашымъ листомъ ему самому, и его жоне, и детемъ ихъ и потомкомъ ихъ, а то тым обычаемхъ, абы онъ и его дети и его потомкове нашымъ потомкомъ служыли тою службою малерскою, а пакъ лизьбы дети его, або потомкове его того ремесла не вмели; и мы то зоставуемъ на ласце нашой, а то имъ потвержаемъ со всемъ съ тымъ, што с тыми двема вышейписаными дворыщами и къ двору здавна прыслухало, якъ ся въ собе и въ собе и въ своихъ границахъ маетъ, одно кромъ ображенья правъ нашыхъ и потомковъ нашыхъ, обычаевъ давнихъ великого князства нашого Литовского, которые заховываемъ въ целости. А што се дотычетъ лововъ звериныхъ въ томъ именьи, они ани люди ихъ не мають зверу ловити, олижъ рогатина наша пройдетъ разъ або два въ году, а потомъ они мають собе зверь ловити.
А коли се пригодить духъ рыбный у въ озерахъ ихъ, они напередъ не мають рыбъ ловити, олижъ на замокъ мають ведомо дати.
А надъ то и печать нашу прывесистую казали есмо прыложыти къ сему нашому листу. При томъ были: вельможный Миколай Вольскій, охмистръ нашъ, а князь Левицкій; писарь нашъ.
Писанъ у Кракове. Подъ леты Божого Нароженья 1525, месяца Апреля 20 день, индикт 13.
Немає коментарів:
Дописати коментар